Prins 2025
Prins Marco I regeert euver ‘t Louverriêk in 2025!

Op zaoterdig 25 jannewari 2025 is Marco Jacobs in ’t biezeen van vööl luuj op een ongekènd spannende meneer oetgerope tot Prins van ’t Louverriêk. Hae zal gaon regere euver alle “Louvermenkes en Louverwiefkes” es Prins Marco I.

Ozze nuje prins bienao 30 jaor geleje gebóare es zoon van Guus Jacobs en Angelique Stelten. Hae haet ein jongere zöster en broor, Laura en Dennis. Zien ganse laeve woont hae al in Buchte en is dus eine gebóare en getóage Louverman. Noe woont hae bie zien pap en Lenie, de vrouw van Guus, op de Kieërwaeg 24.
Dat Marco enne kieër prins van ’t Louverriêk zou waere sjtong al vreug vas. Hae haet in 2002 geoefend es kleuterprins. In 2007 haet hae opnuuj beweze dat hae vastelaovesblood door zien lief haet sjtruime es jeugprins bie De Louvermen. Sowieso zit de vastelaovend in ’t blood van de femilie Jacobs. De pap van Marco, Guus viert dit jaor zien 4×11 jaorig jubileum bie KV De Louvermen.

Prins Marco wirk es zelfstandige ongernummer in de boew. Sinds ein jaor of 4 runt hae same mit ziene pap hun eige boewbedrief, Jacobs Bouw & Advies.

Es ozze prins neet aan ’t boewe is, haet hae ’t ouch flink drök, zeker ouch mit en veur de vastelaovend. Marco is sinds 2020 lid van KV De Louvermen. Naeve allerlei facilitaire zake, is hae mit die daag veural hieël drök mit de jeugprins en jeugprinses in de watte te lègge. Es ein van de vaste adjudanten van ’t jeugprinsepaar zörg hae dat ’t hun aan niks ontbruk. Dit jaor zal hae dees taak delegere aan zien kompanen van de jeugprinsecommissie.

Ouch is ’t enne echte sjnelheidsduvel es hae same mit zien vrunj oppe motor krup, om get te gaon toeren. Om die sjnelheid te compensere, zit hae gaer röstig aan de waterkantj nao enne dobber te loere. Onger ’t vösje loestert hae dan gaer nao Kölsche vastelaovesmeziek, want dao is hae ouch gek op. Mit of zonger motor geit hae ouch gaer op vakantie of maak hae ein stedetrip op ziene tied.

Prins Marco I kent geer, same mit jeugprins Ruben I en jeugprinses Fenna, komme felicitere op de prinsereceptie van KV De Louvermen. De pap van ozze prins, Guus viert dan ouch zien 4×11 jaorig jubileum bie de Karnavalsvereiniging. De receptie vundj plaats op zunjig 9 fibbrewarie 2025 vanaaf 11.11 oer in ’t gemeinsjapshoes aan ’t Kirkvonjere in Buchte.

Jeugprins & Jeugprinses 2025
Jeugprins Ruben en Jeugprinses Fenna regere euver ‘t Louverriêk in 2025!

Op zaoterdigaovend 25 jannewari zeen de nuuje jeugdige hóaghede van De Louvermen oetgerope. Dit jaor is dees ieër veur Ruben Offermans en Fenna Brankaert. Hun zulle komend vastelaovessezoen gaon regere euver alle jonge “Louvermenkes en Louverwiefkes” es Jeugprins Ruben I en Jeugprinses Fenna.

Jeugprins Ruben I is enne zoon van Roger en Anouschka Offermans en haet ein zösterke det loestert nao de naam Renée. Same wone ze op Wieënbroek 26.
Dat veur Ruben eine druim is oetgekomme maog waal dudelik zeen. Zien ganse laeve sjteit al in ’t teike van ’t zeen van prins. Dat bliek waal want hae is in 2019 al ens kleuterprins geweas.

Ruben zit in groep 8 van basissjóal ‘Het Avontuur’ . Ruben voetbalt zelf bie de JO12-1 van HBC’09 / vv Bor combinatie. Es hea gein hoeswerk hoof te make geit hae gear vusje aan het Juliana kanaal of op unne forelviever. Auch is hae nog eine trouwe fan van Fortuna Zitterd en PSV.

Jeugprinses Fenna is ein dochter van Johan en Chantalle Brankaert en haet unne broor dae loestert noa de naam Daan. Same wone ze op de Keerwaeg 93.
Veur Fenna geldj eigenlijk hetzelfde es veur Ruben. Zie haet namelik auch altied de druim gehad om ooit ens jeugprinses te maoge zeen. Heure broor is jeugprins geweas in 2023. Fenna zit in groep 8 van basissjóal ‘Het Avontuur’. Op sjóal is zie veurleas kampioen gewore en noe maog zie de sjóal goan vertegenwoordige in de gemeinte Zitterd-Gelaen. Fenna haet versjillende hobby’s zo geit zie elke weak noa manege de Klipper veur peardriejles. Verder sjpeelt zie bugel bie de muziekclub van het NTO orkest in Holtum. Wujer geit zie elke vreidig mit veel plezeer nao Jong Nederland Buchte. Es Fenna nao alle bezigheden nog tied haet blif vaak de telefoon aan heur henj plekke. Zie wilt gear op de heugte blieve van alle nuuj denskes en trends op social media.

Jeugprins Ruben I en jeugprinses Fenna kènt geer same mit Prins Marco I komme felicitere op de prinsereceptie van Karnavalsvereiniging De Louvermen.
De receptie vundj plaats op zunjig 9 fibbrewarie 2025 vanaaf 11.11 oer in ’t gemeinsjapshoes aan ’t Kirkvonjere in Buchte.